Rusiye akimiyeti tarafından "Qırım musulmanları davası" boyunca mahküm etilgen 36 yaşındaki qırımlı Amethan Abdulvapovnıñ babası Rusiye Tahqiqat komitetine Rusiyeniñ Irkutsk vilâyetiniñ Angarsk şeerindeki 2-nci sert rejimli cezahanede teşkerüv keçirilmesini talap etip ariza berdi. Necip Abdulvapov, ilk yaz ayınıñ başında insult keçirgen oğlunı FSİN hadimleri köteklegenini tahmin ete, dep bildire "Qırım birdemligi" cemaat birleşmesi.
O, arizasında Amethanğa nisbeten tüzetüv müessisesinde zorbalıq qullanılğanı aqqında bile, amma qırımlınıñ qorantası tafsilâtlarnı bilmey, dep qayd etti.
Amethan, ailesine insultqa oğrağanını bildirgen soñ, ana-babası, onıñ yüregi 2-nci tüzetüv cezahanesiniñ hadimleriniñ zorbalığına dayanamağanını tüşüne. Necip Abdulvapov Taqiqat komitetinden nezaretçilerni vazife saasındaki vekâletlerini aşqanları içün teşkermekni rica etti.
"Onıñ yüregi sağlam edi. O, iç bir vaqıt şikâyet etmey edi. Amma o, bu cezahanege kelgeninen birden insultqa oğradı. Bu tek küçlü fizikiy areket olğanını ifadeley bile", — dep ayttı siyasiy mabüsniñ babası.
Amethan Abdulvapov Rusiyeniñ İrkutsk vilâyetiniñ Angarsk şeerindeki 2-nci cezahanede insult keçirgeni oraq ayınıñ 17-nde belli oldı.
Amethan Abdulvapov 2022 senesi kiçik ayda Rusiye tintüvlerinden soñ tutuldı. O vaqıt Qırımnıñ bir qaç rayonında Rusiye uquq qoruyıcıları dört insannı tutqan edi: Ansar Osmanov, Marlen Mustafayev, Ernest Seytosmanov ve Amethan Abdulvapov.
Tutulğanlar Rusiyede terrorist tanılğan, amma bir çoq memlekette milliy qanunlar seviyesinde sıñırsız çalışqan "Hizb ut-Tahrir" siyasiy firqasında iştirak etkeninde qabaatlandı.
2023 senesi saban ayınıñ 15-nde Rusiye mahkemesi Abdulvapovnı 10 yıl ve 6 ayğa azatlıqtan marum etti.
