İşğal etilgen Qırımda cenk ve Kıyivniñ kontroli altında olğan topraqlarğa çıquv sıñırlanğanı vaziyetinde ukrayin vesiqalarını elde etmek ve yañartmaq içün aracılıq hızmetlerine talap arta. Bu aqta Qırım aq qorçalayıcılarından biri Qırım.Aqiqatqa bildirdi.
Hızmetler ucuz degil, lâkin bir çoq Qırım sakini Ukrayina devlet müessiselerine şahsen muracaat etip olamağanı içün olardan faydalanmağa mecbur.
"Pek yazıq ki, cenk ep devam ete, bir çoq qırımlı Kıyiv nezaretindeki topraqlarğa özleri barıp, toplağan meseleleri çezilecek vaqıtnı bekley edi. Şimdi bir çoq insan bu meselelerni çezmek içün aracılarğa muhtac ve istek olğan yerde, teklif de bar. Şimdi Qırımda ilân levhaları bu kibi hızmetler aqqında ilânlarnen tolu. Mında eñ esası, bu mevzuğa öz merağınen yaqınlaşqan sahtekarlar ya da Rusiye mahsus hızmetleriniñ hadimlerine rastkelmemek", — dep ayttı aq qorçalayıcı.
Aq qorçalayıcı şunı da qayd etti ki, ukrayin vesiqalarınıñ elde etmesine meraq yarımada sakinleri arasında Ukrayina tarafdarı olğanlarını köstere.
Oraq ayınıñ 15-nde Ukrayina Nazirler Kabineti vaqtınca işğal etilgen topraqlarda alınğan oquv neticelerini ihtisasiy ve aliy tasil seviyelerinde tanıma tertibini tasdıqladı. Aq qorçalayıcılarnıñ aytqanına köre, bu qarar işğal etilgen topraqlardan kelgen bala ve gençlerge ukrayin tasil ve emek bazarına irişimni açtı, em de Rusiye Federatsiyasınıñ işğal etilgen topraqlarından çıqıp, ukrayin akimiyeti nezaret etken şaraitlerde öz-özüni idare etmege imkân bere.
