Qırımda anomal sıcaq ve quru iyül özenlerniñ, hususan cenübiy yalı boyunda, kütleviy şekilde qurumasına sebep oldı. Bu aqta Qırım.Aqiqatqa adı gizli qalğan Sudaqlı ülkeşınas bildirdi.
Onıñ malümatına köre, cenübiy yalı boyunda eñ uzun olğan Suuq Su özeni qurudı, şeer aqımları bile onı qurtaramadı.
«Bütün Qırımda özenler quruy, amma cenübiy yalıda özenlerniñ aman-aman episi deñizge yetmey, aqımı o qadar alçaq. Ayrıca diqqatnı şuña celp etmek isteyim ki, dereler qurıp qaldı, meselâ, bizim TOK «Sudaktan» aqqan deremiz yıllar devamında ilk sefer bütünley qurudı. Yer astı suvları kete, çoqraqlarnı beslemeyler, ve aynı vaqıtta büyük terekler bile quruy. Amma qayd etmek isteyim ki, özen ve çoqraqlar tek normadan bir qaç derecek yüksek olğan qurğaqlıq ve sıcaq sebebinden qurumay. Qırımda kütleviy qurucılıq ve bunıñnen bağlı suv qullanuvı telükeli bir tendentsiya oldı. Yerli akimiyet er yıl yer astı suvlarnıñ tapılmasını arttırmalı, amma quyularnıñ sayısı zaten çoq», – dedi ülkeşınas.
Qırımda Çernoreçenskoye suv anbarı tolmay – Aqyar içün içme suvınıñ eñ büyük çoqrağı.
«Aqmescit suv anbarı tek 57% tolu, Partizan suv anbarınıñ vaziyeti daa beter – 26%, Zagorskoye de tegizleşti. Aluştadaki Körbek suv anbarı 42% tolu, Kutuzov suv anbarı kiçik olsa da (tahmine million kubometrlik), suvsız qala. Çernoreçensk suv anbarında vaziyet ciddiy: suvnıñ tek 34%-ı qaldı», – dep bildirdi işğal etilgen Qırımda Qırım gidrometeorologiya ve tabiat monitoringi gidrologiya ve gidrologik tahminler bölüginiñ yolbaşçısı Natalya Öhremenko.
İşğal etilgen Qırımnıñ paytahtında devam etken qurğaqlıq sebebinden suv obyektleri kritik seviyede suvsız qala, Salğır özeniniñ vaziyeti pek qasevetlendire.
