"Sarı şerit" iştirakçileri işğal etilgen Qırımnıñ Aqmescit, Aqyar ve Yaltada Ukrayina destegine yañı aktsiya keçirdi. Bu aqta areket öz Telegram-kanalında bildirdi.
Qırım şeerleriniñ duraqlarında, soqaqlarında, parklarında ve cemaat naqliyatında Ukrayina timsalleri peyda oldı. Hususan, ukrayin şevronları, "Qırım Ukrayinadır", "Üç renkli bayraqtan igrenem, canım daima mavı-sarı"... ve ilâhre yazılı stikerler.
"İşğal altındaki ukrayinler içün tirenüv bu, öz noqta-i nazarını bildirmek, inançını coymamaq, yalıñız olmağanını ve işğalden azat etilüvniñ olacağına inanmaq içün bir yoldır. Çünki Qırım Ukrayinadır!" — dep bildirdiler areketniñ koordinatorları.
"Sarı şerit" teşkilâtı — Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
