Rusiye arbiyleri iyulniñ 31-ne keçer gecesi Ukrayinağa 317 ava ücüm vastasınen ücüm etti: 309 uçucısız ve sekiz qanatlı raketa, esas yönelişleri Kyiv oldı, dep haber etti Ukrayina Silâlı quvetleriniñ Ava küçleri.
«İlk malümatqa köre, saat 09:00-ğa qadar ava mudafaası radioelektron küreş vastalarınen duşmannıñ 291 ava ücüm vastasını urdı/bastırdı: 288 darbe uçucısızı; 3 İskander-K qanatlı raketası», – dep aytıla haberde.
Ava quvetleriniñ malümatına köre, beş raketanıñ (bir danesi Kyivdeki mesken evge tüşti) ve 12 yerde 21 darbe uçucısızınıñ ücümleri qayd etildi. Bundan ğayrı, 19 yerde urulğan nişanlarnıñ parçaları tüşti, dep bildirdi arbiyler.
Akimiyetniñ aytqanına köre, gece darbesi neticesinde eñ az altı kişi elâk oldı, yüzden ziyade yaralandı. Qıdıruv-qurtaruv işleri daa devam ete, hususan Svâtoşınskıy rayonında, anda Rusiye raketasınıñ ücümi neticesinde 9 qatlı binanıñ kirişi yıqıldı. Akimiyet qurbanlarnıñ sayısı arta bile, dep tenbiley.
Şeer yolbaşçısı Vitaliy Klıçko qurbanlar arasında doquz bala bar, dep bildirdi. Onıñ aytqanına köre, Kyivde büyük cenk başlağanından berli bir gecede yaralanğan balalarnıñ eñ büyük sayısı bu.
Rusiye darbesi ABD prezidenti Donald Trumpnıñ beyanatından soñ endirildi. Trump, Rusiye lideri Vladimir Putinden «közü qaytqanını» ve Rusiye lideri barışıq muzakerelerine razı olacaq 50 künlik müddetni «qısqartacaq» dep ayttı. O, Rusiye içün deadline – 10 kün – iyulniñ 29-nda başlana, dep ayttı.
Kreml bu beyanatnı «diqqatqa aldı», dep bildirdi. Aynı vaqıtta Rusiye prezidentiniñ matbuat kâtibi Dmitriy Peskov Rusiye Ukrayinağa qarşı cenkine aytqan «mahsus arbiy operatsiya» devam ete, dep qayd etti.
