Rusiye arbiyleri iyulniñ 31-ne keçer gecesi Kyivge uçucısız ve raketalarnen ücüm etti, neticede yanğınlar çıqtı, bir insan elâk oldı, eñ az 48 kişi yaralandı, 29-ı hastahanege alındı, dep haber ete Ukrayina akimiyeti.
Paytahtnıñ yolbaşçısı Vitaliy Klıçko qayd etkenine köre, Svâtoşınskıy rayonında mesken evniñ kirişi yoq etildi. «Acele hızmetler adise yerinde çalışa. Bir qaç yaşalmağan binada yanğınlar çıqtı. Solomenskıy rayonında bir qaç evde daireler zarar kördi. Maşinalar yandı. Bir qaç yaşalmağan inşaatta da yanğın ve zararlar bar», – dep yazdı o.
Memleketniñ prezidenti Volodımır Zelenskıy yıqıntılar tübünde insanlar qala, dep bildirdi. «Kyiv. Raketa darbesi. Tam mesken evge. Yıqıntılar tübünde insanlar bar. Bütün hızmetler adise yerinde. Rusiye terroristleri», – dep ayttı o.
«Bugün gece duşman paytahtqa raketa ve dronlarnen ücüm etti. Eñ çoq Svâtoşınskıy ve Solomenskıy rayonları zarar kördi. Umumen Kyivde saat 6:30-ğa qadar bir kişi elâk oldı ve 20-den ziyade yaralandı. Yaralanğanlar arasında kelgen üç polis hadimi bar. Eki yaralanğan kişi yıqıntılar tübünden qurtarıldı», – dep bildirdi iç işler naziri İgor Klımenko.
Onıñ aytqanına köre, qurtarıcılar yıqıntılarnı toplay, müendis tehnikası çalışa.
Ğolosiyıvskıy rayonında, akimiyetniñ malümatına köre, mektep ve bala bağçasınıñ binası zarar kördi, Şevçenkivskıy rayonında darbe dalğası tibbiy müessiseniñ bala bölüginde camlarnı qırdı.
Rusiye darbesi ABD prezidenti Donald Trumpnıñ beyanatından soñ endirildi. Trump, Rusiye lideri Vladimir Putinden «közü qaytqanını» ve Rusiye lideri barışıq muzakerelerine razı olacaq 50 künlik müddetni «qısqartacaq» dep ayttı. O, Rusiye içün deadline – 10 kün – iyulniñ 29-nda başlana, dep ayttı.
Kreml bu beyanatnı «diqqatqa aldı», dep bildirdi. Aynı vaqıtta Rusiye prezidentiniñ matbuat kâtibi Dmitriy Peskov Rusiye Ukrayinağa qarşı cenkine aytqan «mahsus arbiy operatsiya» devam ete, dep qayd etti.
