Rusiye tarafından mahküm etilgen Yaltadaki «qırımlı musulmanlar davasınıñ» mabüsi Vadim Siruknıñ ciddiy tiş problemleri bar, lâkin apiste tedaviylenmey. Bu aqta qırımlınıñ apayı Anna Bogaçeva «Qırım birdemligine» haber etti.
«Tişleri bozula, çünki koloniyada tiş ekimi yoq. Apiste keçirgen doquz yıldan tek bir kere bir qarar tedaviylegenler, taclar qoyğanlar. Şimdi ise tüşe ya da yaramay aldalar. Taclar yaramay keyfiyetli olğanı içün altında aş qala, yanğı başlay. Vadimniñ kariyesi de bar. Diger tişlerni çıqara ediler, çünki apishane şaraitlerinde tedaviylemek mümkün degil edi», – dep tarif etti o.
Bogaçevanıñ aytqanına köre, qoranta koloniya memuriyetine muracaat etip, ekim tutmağa rica etken edi, lâkin bir cevap alamadı.
Rusiye uquq qoruyıcıları Vadim Siruknı 2016 senesi tuttı. Onı Rusiyede yasaqlanğan «Hizb ut-Tahrir» islâm siyasiy teşkilâtı ile alâqası olğanında qabaatladılar. 2019 senesi noyabrniñ 12-nde Rusiyeniñ Cenübiy bölgesiniñ arbiy mahkemesi Siruknı 12 yılğa azatlıqtan marum etti.
