Oraq ayında işğal etilgen Qırımnıñ suv anbarlarında suvnıñ umumiy miqdarı qurğaqlıq ve anomal sıcaq sebebinden eksildi, dep bildirdi Rusiye kontrolindeki suv hocalığı ve melioratsiya komiteti reisiniñ muavini Ahmed Osmanov.
"Şimdi suv kelüvi yoq: yağmurlar yağmay, beketler çalışmay. Suv anbarlarındaki suv seviyesi eksilmege devam ete. Ava şaraitleri tesir ete, amma, eminliknen ayta bilem, yıl devamında suv olacaq. Eyecanlanuv içün sebepler yoq, amma yağmurlarğa ümüt etecekmi. Aqmescit suv anbarı yüzde 60-ı tolu. Suv anbarları yüzde 80-i tolu", — dep ayttı o TASS agentligine bergen izaatında.
Daa evel adı gizli qalğan Sudaqlı ülkeşınas Qırımda anomal sıcaq ve quru oraq ayı özenlerniñ, hususan cenübiy yalı boyunda, kütleviy şekilde qurumasına sebep oldı, dep bildirgen edi. Onıñ malümatına köre, cenübiy yalı boyunda eñ uzun olğan Suuq Su özeni quruğan, şeer aqımları bile onı qurtarıp olamağan.
İşğal etilgen Qırımnıñ paytahtında devam etken qurğaqlıq sebebinden suv obyektleri kritik seviyede suvsız qala, Salğır özeniniñ vaziyeti pek qasevetlendire.
