Rusiye mahkemesi tarafından 11 yılğa üküm etilgen «qırımlı musulmanlar davasınıñ» mabüsi, qırımtatar faali Yaşar Şihametov Rusiyeniñ Kemerovo vilâyetindeki Âya qasabasında İK-37 koloniyasına ketirildi. Bu aqta qırımlınıñ soy-sopları «Qırım birdemligine» bildirdi.
Erkek bu yıl iyünniñ soñunda koloniyağa ketirildi. Şihametov dört yılnı Saratov vilâyetiniñ Balaşov şeerindeki apishanede keçirdi.
2021 senesi fevralniñ 17-nde Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov evlerinde keçirilgen tahqiqat tedbirlerinden soñ Qırımdaki FSB idaresine ketirildi. Soy-soplarına FSB tahqiqatçıları tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan, amma Ukrayınada ve bir çoq memlekette milliy qanunlar seviyesinde sıñırsız çalışqan «Hizb ut-Tahrir» teşkilâtı ile alâqaları bar olğanında qabaatlandı.
2022 senesi sentâbrniñ 9-nda Rostov-na-Donu Cenübiy okrugınıñ arbiy mahkemesi Yaşar Şihametovnı terrorizmde qabaatlap, 11 yılğa azatlıqtan marum etti.
Aq qorçalayıcılarnıñ fikirince, teşkilât azalarını ükümet devrimini azırlav ve terrorizm içün degil, firqa tarafdarlarınıñ Qırımda siyasiy repressiyalarğa qarşı cemaat aktsiyaları, Rusiye akimiyetini tenqit etkenleri ve qırımtatarlar 2014 senesi işğalge qarşı çıqqanları içün taqip eteler.
