Eki ukrayin gençini işğal etilgen topraqlardan çıqarıp oldılar, dep bildirdi Ukrayina prezidenti Ofisiniñ yolbaşçısı Andriy Yermak oraq ayınıñ 30-nda. Daa bir qıznı Rusiyeden qaytardılar.
Yermaknıñ malümatına köre, 16 ve 17 yaşında olğan gençler, Rusiye tarafından yapılğan basqı ve qorquzuvlarğa baqmadan, Rusiye mekteplerine barmaqnı red ete ve gizliden ukrayin mekteplerinde online oqumağa devam ete:
"Şimdi olar Ukrayinanıñ serbest toprağında, öz kelecegini qorqmadan planlaştıra ve qura bileler".
Bundan ğayrı, sekiz yaşında qız bir qaç yıl devamında Rusiyede edi, dep qoştı Yermak: "Uzun bir müddetten soñ, niayet, qorantasınen beraber. "Helping to Leave" taqımına balalarnı qurtaruvda yardımları içün teşekkürler bildiremiz".
Ukrayina akimiyetiniñ resmiy malümatına köre, 2022 senesi kiçik aynıñ 24-nden başlap Ukrayinadan Rusiyege 19 546 bala sürgün etildi. Rusiye tarafı, öz nevbetinde, 700 biñ "Rusiyede qayd etilgen" ukrayin balası aqqında bildire. Bazı allarda olarnı rusiyeli qorantalarğa evlâtlıqqa bereler.
